డా. ఎన్. గోపి
1967 లో ఎన్. గోపి కలం నుండి జాలువారిన కవితా చిత్రం ఇది. అలతి పదాలతో, చిరు వాక్యాలతో కొనసాగిన ఈ కవిత తెలంగాణ పాఠకునిలో గొప్ప సాంస్కృతిక స్పృహ కల్పించింది. గోపి కాల్పనిక ప్రపంచం వాస్తవం పునాదుల మీద ఎంత ప్రసన్నంగా వికసిస్తుందో చెప్పడానికి ఇదో గొప్ప ఉదాహరణ. ఈ రోజు తంగేడు సాహిత్య పత్రకకు ప్రేరణనిచ్చిన సృజన చింతనలో ఈ కవితను ప్రత్యేకంగా పేర్కొనాలి. తంగేడు పాఠకుల కోసం ఈ తంగేడు పూల కవిత.
తంగెడుపూలు అంటే ఒప్పుకోను
బంగరు పూలు
పొంగిన విచారాన్ని
దిగమింగిన పూలు
వెలగలిగిన గులాబీల కన్న
వెలవెలబోయే మల్లెల కన్న
వెలలేని ఈ పూలు మేలు
తెలుగువారి బతకమ్మల కమ్మని మొగాల
వెలుగునింపు పూలు
కాపుకన్నెల ముద్దుగొలుపు ముద్దకొప్పుల్లో
కాపురముండే పూలు
మనసున్న పూలు
మమతలున్న పూలు
వాసనలేకున్నా వలపు
బాసలు నేర్చిన పూలు
పేదపూలు
పేదలపూలు
‘తంగెడుపూలు’ అంటే ఒప్పుకోను
బంగరుపూలు,