పల్లవి: అక్షరమా! అక్షరమా!! నీ
లక్షణమది గొప్పదే అక్షరమా!
చరణం: అజ్ఞానం అంతరించి
విజ్ఞానం వికసించుచు
సృష్టినంత సుట్టేవు అక్షరమా!
నీ ప్రజ్ఞ ఎంత గొప్పదే అక్షరమా || అక్షరమా!!
చరణం : అక్షరాలు జతగూడిన పురుడు పోయు పదములు
పదముల పాదాలే పాటలై పారును యేరులై పొంగును
పొంగేటి పొంగునని అక్షరమది తెల్పును అక్షరమా?
నీ వెంత గొప్ప దానివే అక్షరమా || అక్షరమా!!
చరణం : జంగమాల జాతకాలు
తిర్యక్కుల తిప్పలంత
స్థావరముల అస్తిత్వం తెలుపునంత అక్షరమా!
నీ ఉనికి ఎంత గొప్పదే అక్షరమా || అక్షరమా!!
చరణం : అణువణువున నీవుందువు
అంతరిక్షమందున్నవి అక్షరమై కనుగొందువు
శాస్త్రమందు నేత్రమై సూత్రముగ నీవుందువు అక్షరమా
నీ యుక్తి నెవరెరుగుదురే అక్షరమా || అక్షరమా!!
చరణం : నీవు లేక పలుకు లేదు
పలుకు లేక పిలుపు లేదు
పలుకులోన మెలికలను అక్షరమై తెల్పుదువు అక్షరమా!
నీ ప్రాజ్ఞ ఎంత గొప్పదే అక్షరమా || అక్షరమా!!
చరణం : సమరంతో పనిలేదు
తిమిరానికి తావులేదు
సాటిరారు పోటీలేదు అక్షరమా
నీ పోటియందెవరుందురు అక్షరమా
నీ శక్తికెదురు లేదులే అక్షరమా! || అక్షరమా!!