కలవారి కోడలూ ఉయ్యాలో
కనక మహలక్ష్మి ఉయ్యాలో
కడుగుతున్నది పప్పు ఉయ్యాలొ
కడవలోన పోసి ఉయ్యాలొ
అప్పుడే వచ్చెను ఉయ్యాలో
ఆమె పెద్దన్న ఉయ్యాలో
కాళ్లకు నీళ్లిచ్చి ఉయ్యాలో
కన్నీళ్లు తీసింది ఉయ్యాలొ
ఎందుకూ చెల్లెలా ఉయ్యాలో
ఏమీ కష్టాలమ్మ ఉయ్యాలో
తుడుచుకో కన్నీళ్లు ఉయ్యాలో
ముడుచుకో కురులమ్మ ఉయ్యాలో
ఎత్తుకో బిడ్డనూ ఉయ్యాలో
వెళ్లి వద్దామమ్మ ఉయ్యాలో
చేరి మీవారితో ఉయ్యాలో
చెప్పిరా పోవమ్మ ఉయ్యాలో
పట్టె మంచం మీద ఉయ్యాలో
పవళించిన మామ ఉయ్యాలో
మాయన్నలొచ్చిరీ ఉయ్యాలో
మమ్ము పంపుతార ఉయ్యాలో
నేనెరుగ నేనెరుగ ఉయ్యాలో
మీ అత్తనడుగు ఉయ్యాలో
అరుగుల్ల కూసున్న ఉయ్యాలో
ఓ అత్తగారు ఉయ్యాలో
మా అన్నలొచ్చిరీ ఉయ్యాలో
మమ్ము పంపుతార ఉయ్యాలో
నెనెరుగ నెనెరుగ ఉయ్యాలో
మీ బావనడుగు ఉయ్యాలో
భారతం సదివేటి ఉయ్యాలో
బావ పెద్ద బావ ఉయ్యాలో
మా అన్నలొచ్చిరీ ఉయ్యాలో
మమ్ము పంపుతార ఉయ్యాలో
నెనెరుగ నెనెరుగ ఉయ్యాలో
మీ అక్క నడుగు ఉయ్యాలో
వంటశాలల ఉన్న ఉయ్యాలో
ఓ అక్క గారు ఉయ్యాలో
మా అన్నలొచ్చిరీ ఉయ్యాలో
మమ్ము పంపుతార ఉయ్యాలో
నెనెరుగ నెనెరుగ ఉయ్యాలో
నీ భర్తనే అడుగు ఉయ్యాలో
రచ్చలో కూర్చున్న ఉయ్యాలో
రాజేంద్ర భోగి ఉయ్యాలో
మా అన్నలొచ్చిరీ ఉయ్యాలో
మమ్ము పంపుతార ఉయ్యాలో
కట్టుకో చీరెలూ ఉయ్యాలో
పెట్టుకో సొమ్ములూ ఉయ్యాలో
ఎత్తుకో బిడ్డనూ ఉయ్యాలో
వెళ్లిరా ఊరికీ ఉయ్యాలో
పుట్టినింటికీ నీవు ఉయ్యాలో
శుభముగా పోయిరా ఉయ్యాలో
మెట్టినింటికి నీవు ఉయ్యాలో
క్షేమంగా తిరిగిరా ఉయ్యాలో
____________________________________________________
చిత్తూ చిత్తుల బొమ్మ శివుని ముద్దుల గుమ్మ
బంగారు బొమ్మ దొరికేనమ్మో ఈ వాడలోన
చిత్తూ చిత్తుల బొమ్మ శివుని ముద్దుల గుమ్మ
రాగి బిందె తీస్క… రమణి నీళ్ళకు బోతే
రాములోరు ఎదురాయేనమ్మో… ఈ వాడలోన
చిత్తూ చిత్తుల బొమ్మ… శివుని ముద్దుల గుమ్మ
బంగారు బొమ్మ దొరికెనమ్మో… ఈ వాడలోన
వెండి బిందె తీస్క… వెలది నీళ్ళకు బోతే
వెంకటేశుడెదురాయే నమ్మో… ఈ వాడలోన
చిత్తూ చిత్తుల బొమ్మ… శివుని ముద్దుల గుమ్మ
బంగారు బొమ్మ దొరికెనమ్మో… ఈ వాడ లోన
బంగారు బిందె తీస్క… భామ నీళ్ళకు బోతే
భగవంతుడెదురాయే నమ్మో… ఈ వాడలోన
చిత్తూ చిత్తుల బొమ్మ… శివుని ముద్దుల గుమ్మ
బంగారు బొమ్మ దొరికెనమ్మో… ఈ వాడ లోన
పగిడి బిందె తీస్క… పడతి నీళ్ళకు బోతే
పరమేశుడెదురాయే నమ్మో… ఈ వాడలోన
చిత్తూ చిత్తుల బొమ్మ… శివుని ముద్దుల గుమ్మ
బంగారు బొమ్మ దొరికెనమ్మో… ఈ వాడ లోన
ముత్యాల బిందె తీస్క… ముదిత నీళ్ళకు బోతే
ముద్దుకృష్ణుడెదురాయే నమ్మో… ఈ వాడలోన
చిత్తూ చిత్తుల బొమ్మ… శివుని ముద్దుల గుమ్మ
బంగారు బొమ్మ దొరికేనమ్మో ఈ వాడలోన